Serb qapıçı: "Qarabağ" "Arsenal"ı məğlub edə bilər, oxşar futbol oynayırlar"

“Qarabağ”ın sabiq qapıçısı Boyan Şaranov Futbolxeber.az saytına açıqlama verib.

“Lamiya” klubunun qapısını qoruyan serbiyalı kiper “Qarabağ”ın Avropa Liqasında “Arsenal”la görüşü uğurlu nəticə ilə başa vuracağına inandığını bildirib: “Ümidvaram ki, “Qarabağ” “Arsenal”ı Bakıda məğlub edəcək. Qələbə alınmasa belə, bir xal da pis nəticə sayılmamalıdı. “Arsenal” ötən mövsüm Avropa Liqasında oynayırdı. Həmin vaxtı əsasən ikinci heyətlə oynayırdı. Ona görə də bu “Qarabağ” üçün yaxşı şans ola bilər. Bu oyunu izləmək mənim üçün də maraqlı olacaq”.

Serbiyalı kiper “Qarabağ” və “Arsenal”ın oxşar komandalar olduğunu bildirib: “Oyunu özüm də izləyəcəm. Amma stadiondan yox, evimdə. “Qarabağ” və “Arsenal” oyun stilinə görə bir-birinə çox oxşayır. Çünki hər iki komanda balaca paslar edib, rəqibin cərimə meydançasına yaxınlaşmağı çox sevir. Çox maraqlı oyun olacağını düşünürəm. Ümid edirəm ki, qalib gələn tərəf “Qarabağ” olar”.