Zaur Axundov: “Oyunun erkən başlamasını “CBC-Sport” istədi” (MÜSAHİBƏ)

“İnter”in Müşahidə Şurasının prezidenti Zaur Axundovun Futbolxeber.az saytına müsahibəsi

- Komandanız Topaz Premyer Liqanın V turunda “Sumqayıt”la heç-heçə oynadı. Qələbəni əldən verməyinizə səbəb nə oldu?

- Çətin oyun oldu. Bilirsiniz ki, eyni heyətlə oynamağa məcburuq. Ehtiyat oyunçular skamyamız geniş deyil. Üstəlik, zədəlilərimiz də var idi. Bərabər səviyyədə oyun keçdi. Qələbə də qazana bilərdik. Yekunda 1:1-lik heç-heçə qeydə alındı. Artıq növbəti oyunları düşünməliyik.

- Havanın isti olmasına baxmayaraq, oyun 16:30-da start götürdü. Olmazdı ki, hava şəraitinə görə qarşılaşma heç olmasa 1 saat gec başlasın?

- Oyunun 16:30-da başlaması canlı yayımla əlaqədardı. Bildiyiniz kimi, “CBC-Sport” Premyer Liqanın bütün görüşlərini yayımlayır. Matçın belə vaxtda başlaması da məhz kanalın istəyi ilə idi.

- Deməli, “İnter Arena”nın projektorlarında problem olması haqda deyilənlər düzgün deyil?

- Xeyr, projektorla bağlı hər hansı problem yoxdu. Xatırlayırsınızsa, “Qəbələ” ilə oyunumuz gec saatda başlamışdı.

- Ehtiyat oyunçuların azlığını qeyd etdiniz. Qışda artıq “İnter”in transfer qadağası aradan qalxır.

- Bəli, qışda heyətimizi gücləndirəcəyik. Artıq bu baxımdan işlər görülür. Axtarışlar gedir, qışda güclənəcəyik.  

- Hazırda klubun prezidenti siz olsanız da, azarkeşlər “İnter”in bütün oyunlarını izləyən Rəşad Qasımovu daim dəstəkləyirlər. Hətta bu gün sabiq prezidentin lehinə “ən böyük başqan, bizim başqan” şüarını səsləndirdilər. Bu sizdə qıcıq yaratmır?

- Xeyr, mən belə şeylərə fikir vermirəm. Azarkeşlərimizə böyük hörmətim var. Mənim üçün əsas olan komandanın qələbə qazanmasıdır.