Yakub Jezniçak: "Hamını təəccübləndirmək istəyirik"

“Qarabağ”ın polşalı müdafiəçisi Yakub Jezniçak ölkəsinin mətbuatına müsahibə verib.

Futbolxeber.az saytının məlumatına görə,  təcrübəli futbolçu bir çox məqamlara toxunaraq, maraqlı fikirlər səsləndirib.

- Çempionlar Liqasının (ÇL) III təsnifat mərhələsinin “Şerif”lə cavab görüşündə burnunuz və barmağınız qırıldı. Hazırda özünüzü necə hiss edirsiz?

- Burnum, həqiqətən də, qırılıb. Ancaq həkim mənə qoruyucu maskanın lazım olmadığını bildirdi. Barmağım da əzilsə də, vəziyyətim pis deyil. Əsas odu ki, qalib gələn tərəf biz olduq. “Qarabağ” ÇL-in pley-off mərhələsinə heç vaxt yüksəlməmişdi. Onlar həmişə III təsnifat mərhələsində mübarizəni dayandırmışdılar. Bu mənada, tarixi nailiyyətə imza atmaq üçün yaxşı şansımız var. Düzdü, pley-offda cütün favoriti “Kopenhagen”di. Amma biz hamını təəccübləndirmək və ÇL-in qrup mərhələsinə adlamaq istəyirik. Bunu bacarsaq, həm klub, həm də mənim üçün möhtəşəm olar. Ardıcıl ikinci dəfə ÇL-in qrupunda oynamaq arzusundayam.

- Sizdən fərqli, sabiq komandanız “Legiya” ÇL-in deyil, Avropa Liqasının qrup mərhələsinə düşmək uğrunda yarışacaq. Rəqib isə “Qarabağ”ın üstələdiyi “Şerif”di...

- “Legiya”nın çıxışı məni də təəccübləndirdi. “Şerif” zəif deyil, amma keçmiş komandamın onları üstələmək üçün hər cür imkanı var. Polşa çempionu bu səddi keçməyə borcludu.

- “Şerif”in ev oyunlarında necə atmosfer olur? Yerli azarkeşlər qonaq komandaya cəhənnəm ab-havasını yaşada bilirlərmi?

- Xeyr. Amma yaxşı atmosfer olur. Hardasa “Belxatov” klubunun stadionuna oxşayır. Orada bizim üçün yaxşı oyun keçdi. Həmin anları xatırlamaq xoşdu, çünki 2:1 hesablı qələbə qazandıq. Bakıda qolsuz heç-heçəyə imza atdığımızdan, mərhələ adlayan tərəf biz olduq.

- “Legiya”nı tərk edib, ekzotik ölkə olan Azərbaycana yollanmaq qərarını verəndə çox düşündünüz?

- Menecerim Azərbaycandan təklif gəldiyini deyəndə ona bildirdim ki, maliyyə şərtləri çox yaxşı olmalıdı. Demək olar ki, qərarımı 1 gün ərzində verdim. İndiki məqamda da çox xoşbəxtəm, fikirləşdiyimdən də yaxşıdı. Klubun böyük bazası və məhsuldarlığı var. Günəşi sevirəm. Gəldiyim gündən Bakıda yağış yağmayıb. Deyəsən, bundan sonra da yağmayacaq (gülür).

- Bakıda polyaklarla rastlaşmısız?

- “Yagelloniya”nın keçmiş oyunçusu Dani Kintana ilə hazırda komanda yoldaşıyam. Onun həyat yoldaşı polşalıdı. Donald Gerrye isə vaxtilə “Visla”da çıxış edib. Donaldın da xanımı polyakdı və 2 övladı var.

- “Qarabağ” Ağdamı təmsil etməsinə baxmayaraq, ev oyunlarını Bakıda keçirir...

- Klubun əsası Ağdamda qoyulub. Amma həmin şəhər Azərbaycan və Ermənistan arasında yaşanan müharibə zamanı dağıdılıb. Bakıda da çoxlu fanatlarımız var. Qarşımıza böyük məqsəd qoymuşuq. Çempionlar Liqasının qrupuna düşməyi, həmçinin ölkə çempionu olmağı hədəfləmişik.