Albanların kapitanı: "Neftçi"nin 3-4 futbolçusu var ki, yarım milyon avro dəyərindədir"

Çempionlar Liqasının II təsnifat mərhələsində "Neftçi"nin rəqibi olan Albaniya "Skenderbeu"sunun kapitanı Bledi Şkembi vətənində müsahibə verib. Futbolxeber.az-ın məlumatına görə, 34 yaşlı futbolçu "Neftçi"yə qarşı keçirəcəkləri matçlar haqda bunları deyib: "Əmin olun ki, “Neftçi” ilə Çempionlar Liqasında hər 2 matçda Avstriyadakı yoxlama oyunlarından tam fərqli komanda görəcəksiniz. Artıq məlumdur ki, “Neftçi” bizdən qat-qat yüksək səviyyədədir. Onların 3-4 futbolçusu var ki, yarım milyon avro dəyərindədir. Heyət baxımından komandalar arasında fərqlər var. Bununla belə, biz öz oyunumuzu göstərib, qalib olmaq üçün sona kimi mübarizə aparmalıyıq. Ümid edirəm ki, biz Azərbaycanda keçiriləcək ilk oyunda müsbət nəticə əldə edib, vətənə inamla qayıdacağıq. Gəlin, sonadək yaxşı nəticəyə ümid bəsləyək".