Roman Qriqorçuk: "Bizə mütləq hücumçu lazımdı"

“Qəbələ” klubunun baş məşqçisi Roman Qriqorçuk apapsort.az saytına danışıb. Futbolxeber.az sizi ukraynalı mütəxəssisin həmin müsahibəsi ilə tanış edir:

 

- Qış fasiləsində əksər klublarımız kimi, “Qəbələ” də Türkiyədə hazırlıq prosesi keçdi. Antalya toplanışı ürəyinizcə oldumu?

- Komanda Türkiyədəki əlverişsiz hava şəraiti ilə əlaqədar, Antalyaya vaxtında yollana bilmədi. Sonra isə hər şey qaydasına düşdü. Həm hava baxımından bəxtimiz gətirdi, həm də güclü sparrinq rəqiblərlə oyun keçirdik. Ümumilikdə, toplanış yaxşı alındı.

 

- Antalyada 4 yoxlama oyunu keçirdiniz ki, bunların ikisində qələbə, birində heç-heçəyə imza atdınız, ilk görüşdə isə məğlubiyyətlə üzləşdiniz...

- Yoxlama oyunlarını qeydə alınan nəticələrə görə qiymətləndirməyi xoşlamıram. Mənim üçün əsas həmin görüşlərin komandaya nə dərəcədə faydalı olmasıdı. Yoxlama matçlarına ciddi məşq kimi baxıram. Bu oyunlarda nə qazandığımızı, bizə nə lazım olduğunu görmək istəyirik. Futbolçuları müxtəlif taktiki sxemlərdə sınaqdan keçiririk. Yoxlama oyunları məhz bunun üçündü. O ki qaldı nəticəyə, təbii ki, nəticə həmişə önəm kəsb edir. Sadəcə, yoxlama matçlarında ondan da vacib amillər var.

 

- Komandanız çempionatın ikinci yarısına tam hazırdımı?

- Bu suala dəqiq cavabı çempionatın gedişində vermək olur. İndi isə bu barədə danışmaq bir qədər doğru çıxmaz. Toplanışın komandaya faydalı olub-olmadığını rəsmi matçlarda görəcəyik. İkinci yarıda qeydə alınacaq nəticələr sualın ən doğru cavabı olacaq.

 

- Qış fasiləsində Petar Franyiç və Sadiq Quliyevlə yolları ayırdığınız halda, hələlik yalnız Araz Abdullayevi transfer etmisiz. Qış “transfer pəncərəsi” bağlanana qədər “Qəbələ”dən  növbəti transfer görə bilərikmi?

- Bizə mütləq hücumçu lazımdı. Əsas hədəfimiz budu və istəyimizə çatmaq üçün əlimizdən gələni edəcəyik. Amma qış “transfer pəncərəsi”ndə səviyyəli futbolçu gətirmək çox çətindi. Bütün imkanlardan istifadə edirik, lakin alınıb-alınmayacağını bilmirəm.

 

- Xarici mətbuatda “Partizan”ın bolqarıstanlı hücumçusu Valeri Bojinovun adı “Qəbələ” ilə birgə hallanır. Onunla danışıqları davam etdirirsizmi?

- Fasilə müddətində çoxlu namizədləri nəzərdən keçirdik. Bir çox futbolçu ilə danışıq apardıq, xeyli oyunçunun video-görüntüsünə baxdıq. Doğrudan da, transfer etmək istədiyimiz futbolçuların hər biri yüksək səviyyəlidi. Amma kiminsə soyadını fərqləndirməyə ehtiyac duymuram. Çünki biz yalnız transfer etdiyimiz futbolçular barədə danışırıq. Mənim qaydalarımda komandamızda yer almayan oyunçunun soyadını çəkmək yoxdu.

 

- Yeni transfer Araz Abdullayevin məşqlər və yoxlama görüşlərindəki çıxışından razı qaldınızmı?

- Arazla tez-tez ünsiyyətdə oluruq. Başa düşür ki, çox çalışmalıdı. Gördüklərim məni Arazın böyük potensialı olduğuna əmin edir. Amma hələ də potensialını tam açmayıb. Məhz bunun üzərində çalışırıq ki, Araz “Qəbələ”də bütün imkanlarını göstərsin, hansısa bacarığını gizlətməsin (gülür). Məşqlərdə yaxşı iştirak edir, ondan razıyam. Arazın “Qəbələ”nin heyətində özünü yaxşı tərəfdən göstərmək və komandanın önəmli fiqurlarından birinə çevrilmək şansı var.

 

- Antalya toplanışında iştirak etmiş Cavid Hüseynov 90 dəqiqə oynamağa artıq hazırdımı?

- Cavid məşqlərdə həvəslə iştirak edir, üzərində çox çalışır. Həm o, həm də digər futbolçular bilirlər ki, mənim prinsipim dəyişməyib, meydana tam hazır olanları buraxıram. Hamının oynamaq üçün şansı eynidi. 

 

- Türkiyə mətbuatında “Qəbələ”nin yarımmüdafiəçisi Filip Ozobiçin adı “Bursaspor”la birgə hallanır. Xorvatiyalı futbolçu ilə bu barədə söhbətiniz olubmu?

- Mən bu cür şayiələrə, ümumiyyətlə, önəm vermirəm. Belə xəbərlər tez-tez yayılır. Əgər konkret bir şey yoxdusa, şərh bildirmirəm. Filip hazırda “Qəbələ”dədi və bizim ona inamımız böyükdü. Getdikcə “artırır”, gündən-günə daha güclü futbolçuya çevrilir.

 

- Qış fasiləsindən sonra çempionatda ilk oyununuzu “Sumqayıt”a qarşı keçirəcəksiniz. Avrokuboklara vəsiqə qazanmağı hədəfləyən rəqib qələbə istəyinizi reallaşdırmağa mane ola bilərmi?

- Təkcə “Sumqayıt” yox, çempionatda çıxış edən bütün komandalar digərlərinə problem yarada biləcək gücdədilər. Bizə rəqiblərimiz üzərində qələbə qazanmaq asan başa gəlmir. Hər birinə hörmətlə yanaşırıq. Başa düşürük ki, qış fasiləsində bütün rəqiblərimizdə dəyişikliklər olub. Bundan əlavə, “Qəbələ” ilə oyuna bütün komandalar daha çox motivasiya ilə çıxırlar. Matça ciddi hazırlaşırıq. Bizə qələbə lazımdı.

 

- Turnir cədvəlində izlədiyiniz “Qarabağ” “Neftçi” ilə üz-üzə gələcək. Yəqin ki, bu oyunda “Neftçi”yə azarkeşlik edəcəksiniz...

- “Qarabağ”ın digər komandalarla matçları mənim üçün böyük önəm kəsb etmir. Başa düşürəm ki, bizə ilk növbədə, öz oyunlarımız vacibdi. Yaxşı oynamalı, həm onlara, həm də digər komandalara qalib gəlməliyik. Niyə “Qarabağ”ın başqa görüşləri barədə düşünüm ki? “Qarabağ” güclüdü və əksər rəqiblərini məğlub edəcək. Biz ilk növbədə, özümüz barədə düşünməli və enerjimizi hansısa komandaya azarkeşlik etməyə xərcləməməliyik. Düzdü, həmin görüşə baxacağam. Çünki hər iki rəqibimizi təhlil etmək mənasında, bu mənə lazımdı. Amma ilk növbədə, öz oyunlarımız və nəticələrimiz barədə düşünürəm.

 

- “Qəbələ” bu mövsüm çempionatın və ya ölkə kubokunun qalibi ola biləcəkmi?

- Çoxdandı bunu istəyirik. Əlbəttə ki, titul qazanmaq əla olardı. Amma təkcə istəməklə olmur. Çox ciddi rəqiblərimiz var. Lakin öz üzərimizdə işləyirik və inkişaf edirik. İnanırıq ki, buna nail olacağıq.