“Bu, Şeydayevin seçimidir”

Moskva “Spartak”ının Azərbaycan əsilli futbolçusu Aleksandr Səmədov maraqlı açıqlamalar verib.

 

Futbolxeber.az-ın məlumatına görə, Rusiya mətbuatına danışan 32 yaşlı yarımmüdafiəçi Azərbaycan futbolundan da söhbət açıb. O, millimizdə oynamaq təklifindən imtina etməsi ilə yanaşı, Ramil Şeydayevin yığmamızı seçməsinə də münasibət bildirib:

 

“Bəli, mənə Azərbaycan yığmasında oynamaq təklif olundu. Ancaq başqa qərar verdim. Çünki çox istəyirdim ki, Avropa və dünya çempionatlarında oynayım. Düzdür, bu yarışlar bizim üçün uğursuz oldu. Amma bu turnirləri heç vaxt unutmaram. Avropa çempionatında Uelslə oyunda cəmi 20 dəqiqə oynadım. Ancaq mənim üçün bu, çox vacib idi. Ramil Şeydayevin Azərbaycan millisini seçməsinə normal baxıram. Bu, onun seçimidir”.

 

Qeyd edək ki, 2001-2005-ci illərdə də “Spartak”da çıxış edən Rusiya millisinin üzvü bir neçə gün öncə digər Moskva təmsilçisi “Lokomotiv”dən ayrılaraq bu kluba keçib.