“Kəpəz”in legioneri qayıtdı

Həftəsonu Topaz Premyer Liqasında qış fasiləsi başa çatacaq və komandalar mövsümün ikinci hissəsi üçün mübarizəyə start verəcəklər. 

 

Futbolxeber.az-ın məlumatına görə, 2017-ci ilin ilk rəsmi matçında, XV turda “Kəpəz” səfərdə “İnter” ilə qarşılaşacaq. Bakıda keçirilən təlim-məşq toplanışından sonra iki gün istirahət edən Gəncə təmsilçisi bu gündən qarşıdakı oyunun hazırlığına start veriblər. Komanda “Dalğa Arena”nın süni örtüklü meydançasında hazırlaşır. “Sarı-göylər”in məşqi saat 11:00-da başlayıb. Yanvarın 26-na kimi Şahin Diniyevin komandası eyni vaxtda Mərdəkanda məşqə çıxacaq. “Kəpəz” Bakı təmsilçisi ilə matçdan öncəki hazırlıq prosesini görüşə ev sahibliyi edəcək “İnter Arena”da keçirəcək.

 

Türkiyədə bir müddət öncəki qeyri-sabit hava şəraitinə görə vətəni Braziliyada ləngiyən Dario Frederiko da artıq komandaya qoşulub və məşqlərdə iştirak edir.