“Turan Tovuz”un uduzduğunu bildiyimizdən meydana arxayın çıxmışdıq”

“Bizdən əvvəl “Turan Tovuz”un uduzduğunu bilirdik. Buna görə də meydana arxayın çıxmışdıq. 2:0 öndə idik. Lakin bu üstünlüyü əldən verdik və yekunda məğlub olduq”. Futbolxeber.az saytına açıqlamasında bu sözləri “Zaqatala”nın üzvü Osman Qurbanov I divizionun 13-cü turunda səfərdə “Şərurspor”a 3:4 hesabı ilə uduzduqları oyundan sonra deyib.

23 yaşlı hücumçu komandasının ilk dövrədəki çıxışına belə qiymət verib: “Mövsümə uğursuz start verdik. Amma 5-ci turdan sonra çıxışına keçdik. Ardıcıl 8 qələbə qazandıq. Təəssüf ki, son turda uduzduq. Yoxsa, ilk dövrəni lider kimi bitirə bilərdik. Bu məğlubiyyət hər birimizə pis təsir etdi”.

Qurbanov qeyd edib ki, “Zaqatala”nın məqsədi dəyiıməz qalıb: “Qarşıdan qış fasiləsi gəlir. Yaxşı hazırlıq keçəcəyik. Planlarla bağlı baş məşqçimiz ətraflı danışa bilər. Məqsədimiz Premyer Liqaya yüksəlməkdir. İkinci dövrədə də istəyimizə çatmaq üçün əlimizdən gələni edəcəyik”.

Söhbətləşdi: FƏRƏC

“Layihə AFFA yanında Media Komitəsi tərəfindən maliyyələşdirilir”