Azərbaycanlı xanım hakim: “Qaqaş, get, futboluvu oyna da”

Bu gün “Kəpəz” yoxlama oyununda “İnter”in əvəzedici heyəti ilə qarşılaşıb. Görüşü canlı izləyən Futbolxeber.az saytının əməkdaşının verdiyi məlumata görə, matçı Yuliya Qurbanova idarə edib. Ona kömək edən yan xətt hakimlərindən biri də xanım olub - Xəyalə Əziz.  

Qarşılaşma zamanı məşqçi və futbolçularla hakimlər arasında maraqlı dialoqlar yaşanıb. Epizodların birində top “Kəpəz”in müdafiəçisindən auta çıxsa da, Xəyalə Əziz “İnter”in əleyhinə qərar verib. Epizoda yaxın olan “İnter”in baş məşqçisi Fizuli Məmmədov hakimə iradını bildirsə də, o, “top ağlardan çıxdı” deyib. Lakin baş hakim köməkçisinin səhvini düzəldib.

Başqa bir epizodda isə baş hakim “Kəpəz”in qapısına cərimə zərbəsi təyin edib. Gəncə klubunun müdafiəçisi epizoda sərt reaksiya verib. Hakim qərarını dəyişməsə də, Şahin Diniyev futbolçusundan sakitləşməyi tələb edib: “Hakim də insandı, o da səhv etməlidir”

Matçdan sonra “İnter”in futbolçularından biri paltardəyişmə otağına yollanarkən baş hakimə iradlarını çatdırıb. Xanım referi həmin futbolçuya “Qaqaş, get, futboluvu oyna da” deməklə kifayətənib.