"Qarabağ"ı məğlub etdikləri üçün futbolçularıma qəhrəman deyə bilmərəm”

"Qarabağ”a qarşı pis oynamadıq. Xüsusilə ikinci hissədə yaxşı çıxış etdik. Oyundan razı qaldım”. Futbolxeber.az saytının məlumatına görə, bu sözləri "İnter"in baş məşqçisi Zaur Svanadze Topaz Premyer Liqasının I turunda "Qarabağ"la keçirilən ev oyunundan sonra deyib.

Gürcü mütəxəssis 2:1 hesablı qələbəni belə şərh edib: "Qarabağ"ı məğlub etdikləri üçün futbolçularıma qəhrəman deyə bilmərəm. Amma onlara məğlub olacaqları təqdirdə də irad bildirməyəcəyimi söyləmişdim. Çempionatın iştirakçıları güclü, iddialı komandalardır və bu baxımdan çətin olacaq. Ötən mövsüm bizim 15-16 futbolçumuz vardı. Qalanları gənc idi. İndi heyət genişdir hər mövqeyə iki namizəd var. Hədəfimiz avrokuboklara vəsiqə qazanmaqdır. Qələbəni bütün komandanın ayağına yazmaq lazımdır. Özümüzü favorit hesab etmirik".