Yaşar Seyidov: “Əvvəldən deyilsəydi ki, “Şahdağ”la oyunumuz canlı nümayiş olunmayacaq...”

“Peşəkar Futbol Liqasının rəhbərliyi ilə oyunun canlı yayımlanması ilə bağlı söhbətimiz olmuşdu. Bizə deyilmişdi ki, “Şahdağ”la oyunumuz canlı yayımlanacaq”. Futbolxeber.az saytına müsahibəsində bu sözləri “Bakı”nın icraçı direktoru Yaşar Seyidov deyib.

Klub rəsmisi canlı yayımla əlaqədar olaraq stadionu hazır vəziyyətə gətirdiklərini bildirib: “Biz canlı yayıma tam hazır idik. Stadion hazır vəziyyətə gətirilmişdi. Elektron reklam lövhəsi belə işə salınmışdı. Lakin sonradan məlum oldu ki, matç canlı yayımlanmayacaq. Bu səbəbdən də “Şahdağ”la oyunumuz təbii deyil, süni örtüklü meydançada baş tutdu”.

Yaşar Seyidov bildirib ki, digər kanallar “Bakı”nın oyununu canlı yayımlamağa hazırdılar: “Bu gün də PFL-lə danışığımız oldu. Növbəti ev oyunumuz noyabrın 12-də olacaq. İnanırıq ki, həmin oyunumuz “CBC-Sport”la göstəriləcək. Bizə əvvəldən deyilsəydi ki, “Şahdağ”la oyunumuz canlı nümayiş olunmayacaq, o zaman alternativ variantlara əl atardıq.

Bizim sponsorlarımız var və onlar da maraqlıdırlar ki, “Bakı”nın oyunları televiziya vasitəsi ilə canlı yayımlansın. Klubun marketinq siyasətini nəzərə almaq lazımdır”.