“Bakcell Arena”da növbəti qalmaqal: Kiprli jurnalist aranı qatdı

Avroliqanın III təsnifat mərhələsinin cavab oyunu çərçivəsində keçirilən “Qəbələ” - “Apollon” görüşündən sonra növbəti qalmaqal MİX Zonada yaşanıb. Futbolxeber.az-ın məlumatına görə, Cavid Hüseynovun azərbaycanlı jurnalistlərə müsahibə verdiyini görən kiprli mətbuat nümayəndələri ona yaxınlaşıblar. Qapıdan çıxarkən futbolçunu yaxalayan kiprli jurnalist Hüseynova, “sən nə üçün Türkiyə bayrağını dalğalandırdın” sualını verib. “Qəbələ”nin kapitanı isə öz növbəsində ingilis dilində ona “Türkiyə mənim dostumdur” deyib. Bundan hiddətlənən və “deyəsən, çox xoşbəxtsən” deyən kirpli jurnalist futbolçumuzun ardınca gedib. Jurnalistin Cavidin çantasını dartdığını görən “Qəbələ”nin meneceri Səbuhi Səfiyarlı hadisə yerinə yaxınlaşıb. Klub rəsmisi həmin jurnalistə Kiprdə baş tutan oyundan sonra Azərbaycanı təhqir etdiyini xatırladıb və bundan sonra məsələ böyüyüb. Nəticədə tərəflər arasında mübahisə düşüb. Olaya AFFA-nın baş katibi Elxan Məmmədov, “Qəbələ”nin vitse-prezidenti Fariz Nəcəfov və polislərin müdaxiləsindən sonra ara sakitləşib.