Adadan adayadək və ya Rauf Əliyev üçün bu qayıdış o qayıdış olacaqmı?

Bir vaxtlar gündəmi zəbt edən Rauf Əliyev. Yetirməsi olduğu “Qarabağ”da parlaq çıxışıyla tanınan təcrübəli hücumçu. 26 yaşı olsa da, beynəlxalq təcrübəsi böyükdür. Təsadüfi deyil ki, uzun illər “Qarabağ”ın heyətində Avroliqa həyəcanı yaşayıb, pley-offa kimi irəliləyib. Milli komandamızda da az oyun keçirməyib, 7 qolla bombardirlər siyahısında yuxarı pillələrdə qərarlaşıb.

Təbii ki, Rauf bütün bunlara “Qarabağ”da uğurlu çıxışı zamanı nail olub. Ümumiyyətlə, 2010-2012-ci illər onun karyerasında çox uğurlu alındı. 2010-da “Qarabağ”ın “ilin futbolçusu”, 2011-ci ilin fevralında “ayın oyunçusu", 2011-ci ildə “ilin futbolçusu”, 2011/12 mövsümündə Premyer Liqanın ən yaxşı hücumçusu. Ancaq “Qarabağ”dan ayrılandan sonra uzun müddətdir kölgə altındadır. “Bakı”, “Xəzər Lənkəran” və “Neftçi”də uğursuz karyerası oldu. Təsadüfi deyil ki, hər birində az oynadı, heç avrokuboklar iştirakçısı olmadı. Uzun fasilədən sonra avrokuboka qayıdışı da yeni keçdiyi “İnter”də gerçəkləşdi.

Bayaqdan Rauf haqda yazmağım əbəs yerə deyil. Onun Avropa Liqasında İslandiyanın “Hafnarfyordur” klubuna vurduğu gözəl qol həm də tarixi oldu. Çünki bu, “İnter”in tarixində ilk dəfə 2 mərhələ adlayıb, III təsnifat mərhələsinə çıxması demək idi. Qələm əhlinin bir nümayəndəsi, neçə ildir bu sahədə olan bir insan kimi Raufun uğurlu çıxışı məni çox sevindirdi. Təbii ki, bizlər avrokuboklarda bütün təmsilçilərimizə azarkeş edirik, hamısının uğur qazanmasını istəyirik. “İnter”də çoxlu legionerlər olduğu halda, tarixi qolu azərbaycanlı futbolçunun vurması məni daha çox sevindirdi.

Bu qol Əliyevin özünə də çox lazım idi. Çünki yeni klubunda qol hesabını açan və son 3 ildə uğursuz karyerası olan hücumçuya özünəinam baxımındam çox vacibdir. Üstəlik, “Şəfa” stadionu kimi tanınan “İnter Arena”da o, cəmi 3 ay öncə uğursuzluq yaşamışdı. Həmin vaxt “Neftçi”nin heyətində məhz “İnter”lə oyunda özü qazandığı, ancaq vura bilmədiyi penaltidən sonra çıxarılmış, xeyli vaxt klubsuz qalmışdı.

Bu qol həm ona görə Əliyevə lazım idi ki, artıq 4 ildir avrokuboklarda qol vurmurdu. Sonuncu dəfə “Qarabağ”ın 2011-ci ildə Belçikada “Brügge”yə 1:4 hesabı ilə uduzduğu oyunda fərqlənmişdi. Bu, Raufun avrokuboklarda 4-cü qolu idi. “Qarabağ”da həmçinin “Visla”ya, “Streymur”a qol vurub. “İnter”də olduğu kimi hər iki halda da mərhələ keçiblər. Ümumiyyətlə, Əliyev ada təmsilçilərinə qol vurmaq üzrə ixtisaslaşır. Bir vaxtlar Farer adalarını, indi isə İspandiya təmsilçisini məyus etdi və hər iki halda komandalarını Avropa Liqasının III təsnifat mərhələsinə çıxardı. "İnter"lə qışa kimi anlaşsa da, ola bilər uğurlu çıxışın müqabilində qalıb, hələ də qazanmadığı çempionluğa orada qovuşacaq.

Qarşıda isə Raufu daha çətin sınaq – “Atletik” kimi rəqiblə oyun gözləyir. Bir çox futbolçularımız, əsasən da millimizin üzvləri ispanlara qarşı oynamağı çox arzulayır. Ancaq bu, Raufa və orada olan azərbaycanlı futbolçulara qismət olur. Onlardan qapıçı Səlahət Ağayevi nəzərə almasaq heç biri hazırda milliyə cəlb olunmur. Aralarında millidə çox oynamış, hətta liderlərindən biri olmuş məhz Əliyevdir. Kim bilir, hücumçu “Atletik”lə də oyunda öz sözünü deyəcək və bu, onun uzun müdətdir ayrı düşdüyü milliyə dönüşünə imkan yaradacaq. Hər halda, mərkəz hücumçusu sarıdan sıxıntısı olan milli komandamıza Rauf Əliyev kimisi lazımdır...

Mehman SÜLEYMANOV