“Neftçi”yə 2 dəfə uğursuzluq gətirən hakim “Seltik” - “Qarabağ” oyununda

Çempionlar Liqasının üçüncü təsnifat mərhələsinin ilk oyunu çərçivəsində keçiriləcək “Seltik” - “Qarabağ” matçının hakimləri müəyyənləşib. Futbolxeber.az-ın məlumatına görə, Qlazqoda baş tutacaq matçı avstriyalı hakimlər briqadası idarə edəcək. Belə ki, görüşün baş hakim Robert Şorgenhofer olacaq.

Bu referi azərbaycanlı futbolsevərlərə tanışdır. Belə ki, Şorgenhofer artıq 3 dəfə avrokuboklarda Azərbaycan klublarının oyunlarını idarə edib. Avstriyalı hakimi xüsusən “Neftçi” üçün uğursuz hesab etmək mümkündür. Çünki onun idarə etdiyi hər 2 matçdan sonra “Neftçi” avrokuboklarla vidalaşıb.

Ilk belə hal 2008-ci ildə baş verib. Avstriyalı hakimin idarə etdiyi “Vasluy” (Rumıniya) - “Neftçi” matçı meydan sahiblərinin 2:0 hesablı qələbəsi ilə yekunlaşıb. Beləcə “Neftçi” üçüncü mərhələdə Intertoto kuboku ilə vidalaşıb.

Ötən il isə Şorgenhofer Avroliqanın pley-off mərhələsinin cavab oyunu çərçivəsində baş tutan və təmsilçizin 1:2 hesablı yenilgisi ilə tamamlanan “Neftçi” - “Partizan” (Serbiya) matçının hakimi olub.

Avstriyalı referi 2012-2013 mövsümündə Avroliqanın I təsnifat mərhələsinin ilk oyunu çərçivəsində baş tutan “Xəzər Lənkəran” - “Lex” matçında (1:1) da fit çalıb.