Qara Qarayev: “Bu barədə mən yox, klub rəsmiləri danışacaqlar”

“Qarabağ”ın üzvü Qara Qarayev “Qəbələ” ilə oyundan sonra Futbolxeber.az saytına müsahibə verib.

- “Qəbələ” ilə oyunda qələbəni sonda əldən verdiniz. Görüşlə bağlı nə deyə bilərsən?

- Yaxşı oynamadığımı düşünürəm. Bir qədər zəif təsir bağışladım. Bura qələbə üçün gəlmişdik. Lakin son dəqiqələrdə 3 xalı əldən verdik. Ümumilikdə yaxşı oynadıq. 1 xal qazandıq. İndi növbəti oyunları düşünməliyik.

- “Qəbələ” ilə görüşlərdə “Qarabağ” artıq 3 oyundur ki, qələbə qazana bilmir. Bunun səbəbi nədir?

- Rəqib bizi yaxşı analiz edir. Necə oynamalı olduqlarını çox yaxşı bilirlər. Güclü kollektivə qarşı oynadıq. Yekun nəticə 1:1 oldu. Nəticədən narazılıq edə bilmərik. Artıq bu oyunu unutmalıyıq.

- Hakimin təyin etdyi penalti epizodu haqda fikirlərin necədir?

- Bu barədə mən yox, klub rəsmiləri özləri danışacaqlar

- “Qəbələ”nin son 8 turda xal itirməməsi oyundan öncə sizi narahat edirdi?

- Sözsüz ki, narahat edirdi. Son vaxtlar yaxşı oynayırdılar. Amma biz də qələbə üçün meydana çıxmışdıq. Təəssüf ki, alınmadı.

- Mövsümün sonu yaxınlaşdıqca “Qarabağ”da yorğunluq hiss olunur?

- Komandada müəyyən dərəcədə yorğunluq var. Ağır mövsüm keçiririk. Lakin yorğunluğu üzərimizdən atıb, son oyunlara yaxşı hazırlaşmalıyıq.

- “İnter”in turnir cədvəlində sizə yaxınlaşması komandanı  narahat edir?

 - Biz 1 tur istirahət etməli olacağıq. Təbii ki, “İnter”in yaxınlaşması bizi narahat edir. İndi mövsüm ərzində baş verənləri yaddan çıxartmalıyıq. Bütün fikrimizi qarşıdakı 3 oyuna yönəltməliyik.

- “Qarabağ” kubokda finala da yüksəlib. “Qızıl dubl” şansının olması komandaya mənfi təsir göstərmir ki?

- Hələ ki, kubok haqda düşünmürük. Çünki final oyununa çox vaxt hələ. Hər həftə çempionat oyunlarımız olur. İndi kuboku yox, çempionatı düşünməliyik.