"Simurq" "İnter" önünə itkisiz çıxacaq

Premyer Liqasının 31-ci turunda "İnter"i qonaq edəcək "Simurq" hazırlıqları tamamlayıb. Futbolxeber.az-ın məlumatına görə, cari mövsümdə doğma arenda keçirəcəyi son matçın məşqlərini dünən başa vuran Zaqatala təmsilçisi bir saatdan artıq davam edən çalışmalara əvvəlcə yüngül qaçış və isinmə hərəkətləri ilə başlayıb. Daha sonra Georgi Çixradze yetirmələrinə meydanın mərkəzində qısa ötürmələrdən ibarət tapşırıq verib. Bundan sonra ikitərəfli futbol və qruplara bölünərək "kvadrat" oynanılıb. Hazırlığın sonunda qapıya zərbələr üzərində məşq edilib.  

Rəqiblərin 15-ci dueli ərəfəsində "Simurq"un heyətində ciddi bir itki yoxdur. Komanda statistik cəhətdən onu üstələyən "İnter"ə qarşı tam heyətlə çıxa biləcək. Zaqatala təmsilçisi "bankirlər" üzərində yeganə qələbəsini cari mövsümdə qazanıb. Bununla yanaşı "sarı-qaralar" tarixinin ən böyük hesablı məğlubiyyətini də, məhz bu il "İnter"lə görüşdə qeydə alınıb (5:0).