"Hazırda Tovuzda sakitçilikdir"

Xəbər verdiyimiz kimi, bu gün Tovuzda azarkeşlərin mitinq keçirəcəyi ilə bağlı xəbərlər yayılıb. Komandanın hazırki durumundan narazı olan fanatlar üsyana hazırlaşırlar. Məsələyə aydınlıq gətirmək üçün "Turan"ın mətbuat xidmətinin rəhbəri Sülyeman Tağıyevlə danışdıq. Klub rəsmisi Futboxeber.az saytına verdiyi açıqlamada bunları dedi: "Azarkeşlərin mitinq keçirəcəyi ilə bağlı xəbərləri mən də saytlardan oxumuşam. Amma bu məsələdən xəbərim yoxdur. Hazırda Tovuzdayam və burada azarkeşlər tərəfindən heç bir hazırlıq aparılmır. Hələ ki heç bir şey yoxdur, şəhərin mərkəzində də sakitçilikdir. Deyilən vaxtda mitinqin baş tutub-tumayacağını dəqiq bilmirəm".   

Azarkeşlərin ən çox narazı qaldığı şəxsin - klubun vitse-prezidenti Namiq Məstanovun da fikirlərini öyrənməyə çalışdıq. Lakin klub rəsmisi ilə əlaqə saxlamaq mümkün olmadı.

Maraqlı məqam ondan ibarətdir ki, hazırda "Turan" rəhbərliyi, eləcə də komanda Bakıda məskunlaşıb. Lakin fanatların mitinqi Tovuzda keçirəcəkləri deyilir. Komanda və rəhbərlik paytaxtdadırsa, tovuzlu fanatlar sözlərini kimə deyəcəklər? Stadionda axı heç kim yoxdur...

Məsələni diqqətdə saxlayacağıq.