“Eyni hal “İnter”in qapısı qarşısında olsaydı, biz də penalti tələb edərdik”

“Neftçi”nin yarımmüdafiəçisi Mirhüseyn Seyidov Futbolxeber.az saytına müsahibə verib.

- “Neftçi” ölkə kubokunun yarımfinal mərhələsinin ilk oyunu çərçivəsində “İnter”i 2:0 hesabı ilə məğlub etdi. Görüşlə bağlı nə deyə bilərsən?

- Evdə oynayırdıq. Bu oyuna çox yaxşı hazırlaşmışdıq. Nəticədə də 2:0 hesabı ilə qalib gəldik. Amma cütün taleyi hələ həll olunmayıb. Qarşıda cavab oyunu var və hər şey həmin matçdan sonra müəyyənləşəcək. İkinci matça da yaxşı hazırlaşmalıyıq.

- Tribunadan belə görünürdü ki, Elvin Yunuszadənin epizodunda hakim “Neftçi”nin qapısına penalti təyin etməliydi. Razısan bu fikirlə?

- Oyun epizodu idi. Dəqiq bir söz deyə bilmərəm. Hakim öz qərarını verdi. Hətta həmin epizodda penalti var idisə belə, bu, bizə aid deyil. Epizodla bağlı qəti söz demək çətindir.

- Yəqin ki, eyni epizod “İnter”in qapısı qarşısında yaşansaydı, siz də penalti tələb edəcəkdiniz...

- Onlar narazılıq etdi. Yəqin ki, eyni hal “İnter”in qapısı qarşısında olsaydı, biz də penalti tələb edərdik. Hər futbolçu öz komandasının xeyrini istəyir.

- “Neftçi” “İnter”lə oyunda çox istəkli görünürdü. Bunu klub rəhbərliyində baş verən dəyişikliklərlə əlaqələndirmək olar?

- Dəyişikliyin komandaya o qədər də təsiri yoxdu. Mövsümün sonuna az qalıb. Biz də Avroliqaya yüksəlməliyik. Bunun üçün ən yaxşı şans isə kubokdur. Əlimizdən gələni edirik ki, kuboku qazanaq.

- “Neftçi” cari mövsümdə ölkə çempionatında “Qarabağ”la bacarmır. Bu baxımdan düşünmək olar ki, qisas almaq üçün “Neftçi” finalda elə Ağdam klubu ilə qarşılaşamaq istəyir?

- Finaldakı rəqibin fərqi yoxdur. Əsas odur ki, finala yüksələk. Ondan sonra rəqibin adı da məlum olacaq. Final oyunu tam başqa olur. İndidən bu haqda nəsə demək çətindi

- Müşahidə Şurasının sədri Çingiz Abdullayev oyundan sonra komanda ilə görüşündə nə dedi?

- Komandanı qələbə münasibət ilə təbrik etdi. Komandada hər şeyin yaxşıya doğruya getdiyini söylədi. Sağ olsunlar, daim komandanın yanındadırlar. Biz rəhbərliyin dəstəyini hiss edirik.

- Oyundan sonra azarkeşlərdən biri sənə yaxınlaşıb, formanı istədi. Polislər isə həmin uşağa qarşı kobudluq etdi. Olmazdı ki, həmin uşağın könlünü alasan?

- O məndən formamı yox, kapitan sarğısını istəyirdi. Mən isə sarğını ona verə bilməzdim. Polislərə də dedim ki, uşağa qarşı kobud rəftar etməsinlər.