Mübariz Zeynalov: "Neftçi”nin yenidən yüksəkdə olması üçün çalışacağıq”

"49 ildən sonra hansısa quruma rəhbərlərdən biri kimi dəvət almaq sevindirici haldı. Mən də bir veteran futbolçu kimi öz təcrübəmi, biliklərimi gənclərə çatdırmağa çalışacağam". Futbolxeber.az-ın məlumatına görə, bu sözləri "Neftçi"nin Müşahidə Şurasının üzvü, veteran futbolçu Mübariz Zeynalov deyib.

Zeynalov Müşahidə Şurasının iclasında öz təkliflərini irəli sürəcəyini bildirib: "Neftçi" həmişə mənim qəlbimdədi. Ürəyimdən nələr keçirsə, həmin təklifləri irəli sürəcəyəm. Təkliflər çoxdu. Görüləsi çox iş var. İstərdik ki, "Neftçi" bundan da yüksəkdə olsun. Biz də bunun üçün çalışacağıq. Sadəcə, fikirlərimizi həyata keçirmək üçün bir az vaxt lazımdı".

Zeynalov Müşahidə Şurasının ilk iclasının vaxtını da açıqlayıb: “Sabiq futbolçu kimi məsləhətlərimi verəcəyəm. Futbolun taktikası var, texnikası var, bunlara Səməd Qurbanovla birlikdə biz cavabdehlik daşıyacağıq. Müəyyən işlər var ki, onlarla Müşahidə Şurasının digər üzvləri məşğul olacaqlar. Hələ bölgü olmayıb. Olandan sonra konkret biləcəyik ki, kim nə ilə məşğul olmalıdı. Aprelin 3-də, "Simurq"la oyundan öncə yığışacağıq və başlanğıc edəcəyik".