Şahin Diniyev: “Yaşar Vahabzadə işinin öhdəsindən layiqincə gələcək”

Məşqçilər Komitəsinin üzvü, təcrübəli mütəxəssis Şahin Diniyev Yaşar Vahabzadənin U-21-in baş məşqçisi təyin edilməsinə münasibət bildirib. Hazırda Sankt-Peterburqda olan Diniyev Futbolxeber.az saytına verdiyi açıqlama təyinatla bağlı deyib: “U-21-in baş məşqçi postuna yerli mütəxəssisin təyinat alması sevindiricidir. Məşqçilər Şurasının iclaslarında da demişdim ki, aşağı yaş qrupu üzrə milli komandaların çalışdırıcıları yerli məşqçilər olsa, daha yaxşı olar. Artıq Yaşar Vahabzadənin təyinatı rəsmiləşib. Federasiya rəhbərliyinin qərarı alqışlanmalıdır. Neçə illərdir ki, Vahabzadə U-21-də köməkçi məşqçi kimi çalışır. Bütün futbolçuları yaxşı tanıyır, kimin nəyə qadir olduğunu bilir. Biz də əlimizdən gələn dəstəyi verəcəyik ki, uğur qazansın. Vahabzadəyə inanırıq. Əminəm ki, işinin öhdəsindən layiqincə gələcək”