“Simurq” AZAL-la oyuna 3 itkiylə hazırlaşır

Azərbaycan Premyer Liqasının IX turunda doğma arenada dünən "Araz Naxçıvan"ı böyükhesabla məğlub edən "Simurq", ara vermədən növbəti oyunun hazırlıqlarına başlayıb. Futbolxeber.az-ın məlumatına görə, səhər saatlarında yağış altında keçirilən məşqdə futbolçular iki qrupa bölünüb. Son görüşdə əsas heyətdə forma geyinən futbolçular qaçış və isinmə hərəkətlərindən sonra məşqi fitness zalda davam etdirib. Qalanları isə qısa ötürmələr və qapıya zərbələrdən sonra ikitərəfli oyun keçirib.

Zaqatalada son hazırlıq işlərini gördükdən sonra "sarı-qaralar" Bakıya yola düşəcək. AZAL-la oyun öncəsi son məşqini isə “Simurq” qarşılaşmanın keçiriləcəyi "AZAL Arena"da edəcək.  

"Simurq" "təyyarəçilər"lə görüşə ciddi itkilərlə çıxacaq. Zədəli Adam Banas və Murad Səttarlı ilə yanaşı, Benjamin Lambot da bu matçda forma geyinə bilməyəcək. Belçikalı futbolçu "Araz Naxçıvan"la oyunda sarı vərəqə limitini doldurduğuna görə komandasına kömək edə bilməyəcək.

Qeyd edək ki, AZAL - "Simurq" qarşılaşması oktyabrın 29-da saat 17:00-da start götürəcək. Zaqatala təmsilçisinin Azərbaycan Premyer Liqasının 2014/15-ci il mövsümünün ikinci dövrəsindəki ilk matçı da "Simurq TV" vasitəsilə "AZAL Arena"dan canlı yayımlanacaq.