Şahin Diniyev: “Təkcə Foqtsun istefası ilə iş bitmir”

“Həmkarımın işdən getməsi futbol adamı kimi mənə ağır gəlir. Amma Foqtsun gedişini normal qarşıladım. Çünki hər şey buna doğru gedirdi”. Futbolxeber.az saytına verdiyi müsahibədə bu sözləri milli komandamızın keçmiş baş məşqçisi Şahin Diniyev deyib.

Diniyev millinin uğursuzluğunun günahını tək Foqtsa görmədiyini bildirib: “Gedənin dalınca pis danışmaq istəmirəm. Amma fakt budur ki, pis-yaxşı Foqtsun Azərbaycan futbolunda xidmətləri olub. Baş məşqçinin işi hər zaman nəticəylə ölçülür. Komanda uğursuz çıxış edirdi və Foqts da özündə cəsarət taparaq, məsuliyyəti üzərinə götürərək vəzifəsindən getdi. Lakin bu o demək deyil ki, yeni gələn məşqçiylə hər şey düzələcək. Xeyr. Hər şeyi analiz edib, düzgün nəticə çıxarmaq və uğursuzluğun səbəbini tapmaq lazımdı. Təkcə baş məşqçi dəyişikliyi ilə iş bitmir. Sabah yeni baş məşqçi gələcək, lakin hər şey 360 dərəcə dəyişməyəcək”.