“Xəzər Lənkəran” “Bakı” ilə oyuna 3 futbolçusuz hazırlaşır

Son üç günü məşqlərini paytaxtda davam etdirən “Xəzər Lənkəran” dünən doğma şəhərə dönüb. Futbolxeber.az-ın klubun rəsmi saytına istinadən verdiyi məlumata görə, cənublular qısa fasilədən sonra axşam məşqini də Lənkərandakı bazasında keçirib. Hazırda Uğur Pamuk və Rəşad Sadiqovla yanaşı Ağabala Ramazanov da zədə səbəbindən hazırlıqda iştirak etmir. Bu gün və sabah oyunöncəsi məşqlərini tamamlayan komanda daha sonra oyun saatını gözləyəcək. Xatırladaq ki, VIII tur çərçivəsində “Xəzər Lənkəran”ın rəqibi paytaxtı təmsil edən “Bakı” klubu olacaq. Matç 19 oktyabr saat 17-də start götürəcək və “Xəzər Lənkəran” TV vasitəsilə canlı yayımlanacaq.