Jaba: “Bakı”ya kömək edə biləcək səviyyədə olmasaydım, heç bura gəlməzdim” (Müsahibə)

Yenidən “Bakı”ya qayıdan braziliyalı hücumçu Jaba Futbolxeber.az saytına eksklüziv müsahibə verib.

- 2 ildən sonra yenidən “Bakı”dasan. Kluba qayıdışın necə baş tutdu?

- Mən “Bakı”dan getsəm də, klubu daim diqqətdə saxlayırdım. Burada xeyli dostlarım var. Həm onlarla mütəmadi olaraq əlaqə saxlayırdım, həm də internet vasitəsi ilə komandanın çıxışını izləyirdim. “Bakı”da 3 il çıxış etmişəm. Burada çox yaxşı günlərim olub. Onları unutmaq qeyri-mümkündür. İndi də komandaya kömək olmağa gəlmişəm.

- Bir çox futbolçular maddi duruma görə “Bakı”dan getdi...

- Mən başqaları haqda heç nə deyə bilmərəm. Amma tanıyanlar bilir ki, pul heç vaxt mənim üçün birinci sırada olmayıb. Əgər, maddiyatı düşünsəydim, burada olmazdım. “Bakı”nın qəlbimdə xüsusi yeri var. Bu klubun Hafiz Məmmədov kimi prezidenti var. Hafiz Məmmədov kimi prezidenti olan klub isə daim ən yüksək pillələrdə olmalıdır.

- İndi azarkeşlıri bir sual maraqlandırır: əvvəlki Jabanı görə biləcəyik?

- Özüm haqqında nəsə desəm, düzgün olmaz. Hər halda, meydana çıxanda necə formada olduğum görünəcək.

- Yəni, formadasan?

- “Bakı”ya kömək edə biləcək səviyyədə olmasaydım, heç bura gəlməzdim.

- “Bakı”nın hazırda turnir cədvəlindəki mövqeyindən xəbərdarsan?

- Təbii ki, komandanın neçənci yerdə olduğunu, son 2 matçda “Araz Naxçıvan” və “Simurq” üzərində qələbə qazandığından xəbərim var. “Bakı” böyük klubdur və turnir cədvəlində tutduğu mövqedən asılı olmayaraq, böyük klub olaraq da qalacaq.

- Son olaraq azarkeşlərə sözün.

- Azarkeşləri çətin gündə “Bakı”ya dəstək olmağa çağırıram. Hər bir komandanın pis günü də olur, yaxşı günü də. Çətinliklər müvəqqətidir. Gəlib, komandaya dəstək olsunlar. Mən də öz oyunumla onları sevindirəcəyəm. “Bakı”nı qarşıda daha gözəl günlər gözləyir. Hər birimiz əl-ələ verib, komandanı layiq olduğu yerlərə qaldıracağıq.