Vüqar Əsgərov: “Araz Naxçıvan”da heç kim oyun satmayıb”

“I divizionda mübarizə aparan “Zirə” klubuna keçdiyim doğrudur. Müqavilə hələ bağlamamışıq. Amma sözləşmənin müddəti ilin sonuna kimi olacaq. “Araz Naxçıvan”la heç bir bağlılığım qalmayıb. Transfer vərəqim də özümdədir”. Futbolxeber.az saytına verdiyi açıqlamada bu sözləri milli komandamızın sabiq hücumçusu Vüqar Əsgərov deyib.

Təcrübəli forvard “Araz Naxçıvan”dan ayrılmasına belə münasibət bildirib: “Futbolda belə şeylər olur. Ayrılmağıma baxmayaraq, komandaya səmimi qəlbdən uğurlar arzulayıram. Əsas heyətə düşməməyimlə bağlı baş məşqçiylə söhbət etmədim. 29 yaşım var. O bilirdi ki, zədəmi yenicə sağaltmışam. Halbuki məni komandada saxlaya bilərdi. Mənə formamı bərpa etmək lazım idi. Amma bütün bunlar artıq keçmişdə qalıb”.

“Araz Naxçıvan”dan ayrılan digər futbolçu - Elhad Nəziridən fərqli olaraq, Vüqar Əsgərov komandada legionerlərin oyun satması fikri ilə razılaşmayıb: “Mən bu haqda heç nə bilmirəm. Ümumiyyətlə, buna inanmıram. Düşünmürəm ki, “Araz Naxçıvan”da kimsə oyun satsın. Komandada heç kim belə iş görməyib”.