“Qarabağ”ın sabiq məşqçisi: “Bu heyətlə Avropada uğur qazanmaq çətindi”

“Qarabağ”lıları ürəkdən təbrik edirəm. Komandaya Çempionlar Liqasında da uğurlar arzu edirəm”. Futbolxeber.az saytına verdiyi açıqlamada bu sözləri “Qarabağ”ın sabiq məşqçisi Mehmet Ak deyib.

Türkiyəli mütəxəssis keçmiş klubunun uzun fasilədən sonra Azərbaycan çempionu olmasına belə münasibət bildirib: “Qarabağ”la ən son ölkə kubokunu qazanmışdıq. İndi isə ölkə çempionu oldular. İnanıram ki, komanda uğurlarının ardını gətirəcək. Baş məşqçi Qurban Qurbanova da təbrik mesajı yolladım. Sizin vasitənizlə də buradan bütün “Qarabağ” azarkeşlərini təbrik edirəm. Xeyirli-uğurlu olsun”.

Mehmet Ak Avropada uğur qazanmaq üçün “Qarabağ”ın güclənməli olduğunu düşünür: “Qarabağ” çempionluğu sərgilədiyi baxımlı futbola, nümayiş etdirdiyi xarakterə və mübarizə əzminə görə qazandı. Lakin bu heyətlə Avropada uğur qazanmaq çətindi. Ən azı 5 yüksək səviyyəli transfer reallaşdırmaq lazımdı”.