Fatih Terim: “Qrupdan çıxmaq bizim üçün vacibdir”

“Qrupdan çıxmaq bizim üçün vacibdir. Xorvatiyanın heyətində çox güclü futbolçular var. Rəqibə hörmətlə yanaşırıq”. Futbolxeber.az saytının məlumatına görə, bu sözləri Türkiyə millisinin baş məşqçisi Fatih Terim deyib.

Sabah AVRO-2016-da Türkiyə millisi ilk oyununda Xorvatiya ilə üz-üzə gələcək.

Bu gün oyunöncəsi mətbuat konfransı keçirən Terim, komandasının gənc üzvü Emre Mor haqda bunları söyləyib: “Gənc Emre unikal futbolçudur. Onu yığmaya çağırmaqla düzgün seçim etdiyimi düşünürəm. İnanıram ki, ondan dünyasəviyyəli futbolçu çıxacaq. Lakin hələ çox şey öyənməlidir”.

İmperator “Ay-ulduzlular”ın aparıcı üzvü Arda Turandan da söz açıb: “Biz istərdik ki, Arda klubunda daha çox oynasın. O, daim millidə forma geyib. Hətta klubunda oyun praktikası olmayanda da yığmaya dəvət alıb. Klubunda nə qədər oynamasından asılı olmayaraq, Arda bizim əsas futbolçumuzdur”.