Arveladze: “Bizdə futbolu azərbaycanlılardan daha yaxşı oynamağı bacarırlar”

Bakıda 17 yaşadək futbolçular arasında Avropa çempionatının final matçını izləyən Gürcüstanın tanınmış veteran futbolçusu Şota Arveladzenin Futbolxeber.az saytına müsahibəsi

- Bakdı keçirilən Avropa çempionatı başa çatdı. Turnirlə bağlı nə deyə bilərsiniz?

- Turnir yaxşı keçdi. Təşkilatçılıq yüksək səviyyədə idi. İnanıram ki, 2020-ci il Avropa çempionatından sonra Azərbaycanda Çempionlar Liqası, Avropa Liqası, UEFA Super Kubokunun finalını da qəbul edəcək. Bütün bunlar Azərbaycan futbolunun xeyrinədir.

- Final qarşılaşmasını canlı izlədiniz. Bakıya gəlməklə bağlı təklifi AFFA-dan almışdız?

- Bəli. Baş katib Elxan Məmmədovla yaxınam, AFFA-da çoxlu dostlarım var. Azərbaycan klublarının avrokuboklarda oyunlarını izləyirik.

- Azərbaycan klublarından dəvət gəlsə, qəbul edərsiniz?

- Əvvəlcə dəvət olsun, sonra baxarıq.

- Azərbaycan və Gürcüstan futbol federasiyalarının əməkdaşlığı görünmür, yoldaşlıq görüşləri keçirilmir. Bu, nədən irəli gəlir?

- Statistikaya baxsaq, Azərbaycanla Gürcüstan yığmaları son 20 ildə təxminən 50 oyun keçiriblər.

- Bu, yalnız 90-cı illərdə olub...

- Mən belə düşünmürəm. Sadəcə, bu cür alınıb. Düşünürəm ki, bu 2 federasiya yaxşı dostdurlar, yaxşı işləyirlər. Bizdə federasiyanın heyəti dəyişib. Ancaq xalqlar dost olaraq qalırlar və birgə inkişaf edəcəklər.

- Azərbaycan və Gürcüstan futbolunu müqayisə etsək, kim hansı yerdədir?

- Müqayisə etmək istəməzdim. Biz maliyyə, iqtisadi, infrastruktur cəhətdən geri qalırıq. Heç kimin xətinə dəymək istəmirəm. Ancaq fikrimcə, bizdə futbolu daha yaxşı oynamağı bacarırlar. Ənənə də belə olub, indi də belədir.

- Uğur qazanmaq üçün Azərbaycan futbolunda nə çatışmır?

- Deyə bilərəm ki, Gürcüstan futbolunda pul yoxdur. Piar böyük rol oynayır. Bu turnirlərdə çıxış edənlər sabah Avropanın böyük ölkələrində oynayacaqlar. Məşhur, varlı olacaqlar. Bizim uşaqlar da bunu görsünlər. Futbola dünyada 7 milyard insan baxır. sevir. Futbolun populyarlaşdırılması Azərbaycan futbolunun inkişafına kömək edəcək. Bu Avropa çempionatı təkcə başqalarına yox, sizə də faydalı olsun. Gələcəkdə bu turnirə bizlər də gələk, biz də sizlərin inkişafına görə sevinək.

"Layihə AFFA yanında Media Komitəsi tərəfindən maliyyələşdirilir"