AVRO-2016: “Onun Kriştianu Ronaldo kimi böyük futbolçu olacağına inanıram”

“Çox maraqlı oyun alındı. Azarkeşlər maraqlı qarşılaşma izlədilər. Turnirə yaxşı başlamağımızın və işləri düzgün qurmağımızın nəticəsi olaraq finala vəsiqə qazandıq". Futbolxeber.az saytına açıqlamasında bu sözləri 17 yaşadək futbolçulardan ibarət Portuqaliya yığma komandasının müdafiəçisi Dieqo Dalot deyib.

Hollandiyaya qarşı keçirilən yarımfinal oyununda komandasının ikinci qolunun müəllifi futbolçu komanda yoldaşı Joao Filipe haqda da danışıb. O, driblinqləri ilə Kriştiano Ronaldonu xatırladan futbolçunun gələcəkdə böyük oyunçu olacağına inandığını vurğulayıb: "Filipe yaxşı futbolçudur. Kriştianu Ronaldo kimi böyük futbolçu olacağına inanıram. Tək o yox, digər futbolçularımız da sözünü deyəcəklər".

Müdafiəçi oyun ərzində hücuma qoşulmamasına da aydınlıq gətirib: "Qələbə qazansaq da, rəqibə hörmətlə yanaşırıq. Bizim oyun taktikamız var. Baş məşqçi kimin necə, harda oynayacağını əvvəlcədən bildirir. Biz də meydanda ona uyğun hərəkət edirik".

"Layihə AFFA yanında Media Komitəsi tərəfindən maliyyələşdirilir"