“Ferensvaroş”un sabiq futbolçusu: “Qarabağ” əla komandadır”

“Ferensvaroş” ilə “Qarabağ” arasında üç il əvvəlki matçdan nəticə çıxarmaq lazım deyil. Həmin vaxtdan indiyədək çox şey dəyişib”.

Futbolxeber.az saytının məlumatına görə, bu sözləri “Ferensvaroş”ın sabiq futbolçusu Loran Paşka keçmiş klubunun UEFA Çempionlar Liqasının pley-off mərhələsində “Qarabağ”la keçirəcəyi oyunlar barədə danışarkən deyib.

Macarıstan çempionunun heyətində 2022-ci ildə Çempionlar Liqasının III təsnifat mərhələsində Ağdam təmsilçinə qarşı oynamış müdafiəçi hər iki komandanın heyətinin dəyişdiyini bildirib: “Qarabağ”ın heyətində tanış simalar olacaq. Bunlar vaxtilə “Ferensvaroş”da oynamış Kadi Borges və Sami Mmaedir. Azərbaycan çempionu əla komandadır, aqressiv futbol oynayır. İki komanda təxminən bərabər gücdədir. Gərgin qarşılaşma olacaq. Hesab edirəm ki, Macarıstan təmsilçisi ilk görüşdə üstünlüyü ələ keçirə biləcək. Birinci oyunda nəyinsə həll olunacağını düşünmürəm. Sabiq komandamın Çempionlar Liqasının əsas mərhələsinə yüksəlmək şansı var”.

Qeyd edək ki, bu gün keçiriləcək “Ferensvaroş” - “Qarabağ” oyunu Bakı vaxtı ilə saat 23:00-da başlayacaq. Cavab qarşılaşması avqustun 27-də Bakıda olacaq.