“Milan” bu gün 114 yaşını qeyd edir

Dünyanın ən titullu klublarından biri olan “Milan” bu gün 114 yaşını qeyd edir. Futbolxeber.az-ın məlumatına görə, Milan təmsilçisinin əsası 1899-cu il dekabrın 16-da qoyulub. Komandanı britaniyalı Alfred Edvards təsis edib. “Milan”ın tarixindəki ilk baş məşqçi Gerbert Kiplin olub. Klubun rənglərini də məhz o seçib.

“Milan” ilk qeyri-rəsmi oyununu 1900-cu il, martın 11-də keçirib. “Qırmızı-qaralar”ın rəqibi isə Milanın digər təmsilçisi “Mediolanuma” olub. Həmin oyunu 3:0-lıq qələbə ilə başa vuran “Milan” ölkə çempionatındakı ilk rəsmi matçını 1900-cu il, aprelin 16-da “Trevizo”ya qarşı keçirib. İtaliyada ilk çempionluğunu komanda 1901-ci ildə qazanıb.

Qazandığı beynəlxalq kuboklara görə (18) “Milan” “Boka Xuniors”la birgə dünyanın 2 ən titullu klubundan biridir. “Rossenyerlər” Çempionlar Kubokunu ilk dəfə 1963-cü ildə qazanıb. Ümumilikdə isə komanda 7 dəfə ÇL-i qazanıb və bu nəticə ilə yalnız “Real”dan geri qalır. Ümumilikdə 11 dəfə ÇL-də final oynayan “Milan” 2 dəfə Kuboklar Kubokunu, 5 dəfə isə UEFA Superkubokunu qazanıb. Sonuncu mükafatı ən çox qazanan komanda olan “Milan” 3 dəfə Qitələrarası kuboku, 1 dəfə Klublarası dünya çempionatını, 18 dəfə Skudettonu, 2 dəfə “B” seriyasını, 5 dəfə İtaliya Kubokunu, 6 dəfə də İtaliya Superkubokunu qazanıb. Sonuncu göstəriciyə görə “Milan” İtaliya rekordçusudur.