Leo Ortis: “Juninyo çox tanınmır, lakin…”

"Flamenqo"nun futbolçusu Leo Ortis "Qarabağ"ın hücumçusu Olaviyo Juninyonun komandalarına gözlənilən keçidi haqda danışıb.

Futbolxeber.az saytının “Mundo Bola”ya istinadən verdiyi məlumata görə, 29 yaşlı braziliyalı müdafiəçi ABŞ-da təlim-məşq toplanışı çərçivəsində bu gün keçirilən mətbuat konfransında etiraf edib ki, Juninyonun oyunu ilə tanış deyil idi:

"Onu elə də yaxşı tanımırdım. Əlbəttə, bir neçə videosuna və oyunlarına baxdım. O, çox keyfiyyətli oyunçudur. Adı çox da tanınmır, lakin "Flamenqo" və onların etdikləri bazar təhlilini nəzərə alsaq, bu, bizə kömək edəcək. Gəlsə, çox köməyi dəyəcək. Çünki hücum mövqeyi Pedronun zədəsi və Qabinin ("Kruzeyro"ya transfer olunub - red.) klubu tərk etməsinə görə boşdur".

Qeyd olunur ki, hazırda "Flamenqo" yanvarın 20-nə qədər davam edəcək ABŞ-da təşkil etdiyi təlim-məşq toplanışını hücumçusuz keçirir.