Mourinyo bu klubdan getdiyinə görə təəssüflənir

“Fənərbaxça”nın baş məşqçisi Joze Mourinyo karyerasındakı səhvləri barədə danışıb.

Futbolxeber.az saytının məlumatına görə, “Corriere dello Sport”a müsahibəsində portuqaliyalı mütəxəssis bildirib ki, “Real”dan getməsi yanlış qərar idi:

“Əgər oyunlardan danışası olsaq, belə matçların sayı çoxdur. Çünki hər məğlub olduğun qarşılaşmadan sonra düşünürsən ki, bəlkə də nəyisə fərqli etmək olardı. Yox, əgər peşəkar seçimdən danışırıqsa, Florentino Peresə verdiyim “yox” cavabını qeyd edə bilərəm. “Real”ın prezidenti mənə “Mou, indi getmə. Sən işin çətin hissəsini artıq görmüsən. Bundan sonra hər şey yaxşı olacaq” demişdi. Mən bilirdim ki, belə də olacaq. Lakin İspaniyada keçirdiyim 3 ağır mövsümdən sonra “Çelsi”yə qayıtmağı çox istəyirdim. Bir də “Roma”dan Avropa Liqasının finalından sonra getməliydim. Lakin getmədim və bu, səhv qərar idi”.

Xatırladaq ki, Mourinyo “Real”ı 2010-2013-cü illərdə çalışdırıb.