Coşqunun komandası liderlik şansını əldən verdi

Azərbaycan millisinin üzvü Coşqun Diniyevin də formasını geyindiyi "Bandırmaspor" Türkiyə 1-ci liqasında 13-cu tur oyununa çıxıb.

Futbolxeber.az saytının məlumatına görə, komanda səfərdə “Kocaliespor”la qarşılaşıb. Bu matçda qələbə qazanacaq tərəf turu lider kimi tamamlayacaqdı.

Gərgin keçən görüş 2:2 hesabı ilə yekunlaşıb. Diniyevin komandası qələbəyə yaxın olsa da, “Kocaliespor” 90+3-cü dəqiqədə penaltidən vurduğu qolla yenilgidən qaçıb.

Coşqun da bu oyunda iştirak edib. 29 yaşlı yarımmüdafiəçi meydana start heyətdə çıxıb və 77-ci dəqiqədə mozambikli müdafiəçi Mexerlə əvəzlənib.

Qeyd edək ki, 13 turdan sonra "Bandırmaspor" 25 xalla turnir cədvəlində ikincidir. Lider “Kocaliespor”un 26, üçüncü pillədə qərarlaşan “Karagümrük”ün isə 24 xalı var.