Zommer: “Düşünmürəm ki, İtaliya futbolu böhrandadır”

İsveçrə millisinin qapıçısı Yan Zommer Avro-2024-ün 1/8 final mərhələsində İtaliyanı 2:0 hesabı ilə məğlub etdikləri oyun barədə danışıb.

Futbolxeber.az saytının “Football Italia”ya istinadən verdiyi məlumata görə, “İnter”in qolkiperi “Skuadra Adzurra”ya qarşı əla çıxış etdiklərini söyləyib:

“Bu, bizim üçün çox müsbət nəticədir. Biz güclü rəqibə qarşı möhtəşəm futbol sərgilədik. Buna görə çox sevinirəm. Meydanda demək olar ki, səhvsiz oynadıq. İtaliya millisi hesabda geri düşdükdən sonra heç cür gedişatı dəyişə bilmədi. Aqressiv idik və topa əla nəzarət etdik. Növbəti matçda da belə oynasaq, mərhələ adlamaq üçün yaxşı şansımız olacaq. Düşünmürəm ki, İtaliya futbolu böhrandadır. İtaliya millisi əla komandadır. Lakin biz onlara qarşı möhtəşəm oynadıq. A seriyasına çox yaxşı bələdəm. Millinin heyətində çox keyfiyyətli futbolçular var”.