Modriç: “ÇL-də altıncı qələbə möhtəşəm nəticə olacaq”

“Real”ın yarımmüdafiəçisi Luka Modriç bu gün Dortmund “Borussiya”sına qarşı keçiriləcək Çempionlar Liqasının (ÇL) final matçı barədə danışıb.

Futbolxeber.az saytının məlumatına görə, UEFA-nın mətbuat xidmətinə açıqlamasında xorvat yarımmüdafiəçi hər zaman özlərinə inandıqlarını bildirib:

“Finalda nəyin vacib olduğu barədə danışarkən bir məqamı xüsusi qeyd etməliyəm. İstedad və ustalıqdan başqa, mənim üçün mühüm olan mentalitetdir. Hansı ki, biz bunu əvvəlki finallarda göstərmişik. Hər zaman özümüzə inanırıq. Hesab edirik ki, biz ən yaxşıyıq və bunu meydanda sübut edirik”.

Modriç kuboku qazanmaq üçün sonuncu addımı atmalı olduqlarını söyləyib: “Nə zamansa ÇL-də 6 qələbə mənim üçün inanılmaz görünürdü. Lakin indi bu uğurun bir addımlığındayam. Bunun üçün yalnız son addımı atmaq qalıb. ÇL-də altıncı qələbə möhtəşəm nəticə olacaq”.

O, finalda şansların bərabər olduğunu vurğulayıb: “Borussiya” fantastik mövsüm keçirib. Biz onlara hörmətlə yanaşırıq. Şanslar bərabərdir. Özümüzə inanırıq, lakin bu, sakit olmağımız anlamına gəlmir. Meydana çıxmalı və finalda qələbəyə layiq olduğumuzu göstərməliyik”.

Xatırladaq ki, bu gün “Uembli”də keçiriləcək “Borussiya” - “Real” finalı Bakı vaxtı ilə 23:00-da start götürəcək.