Pioli derbidən danışdı: “Komanda ruhunu hələ itirməmişik”

“Milan”ın baş məşqçisi Stefano Pioli bu gün İtaliya A seriyasının 21-ci turu çərçivəsində “İnter”ə qarşı keçiriləcək oyun barədə danışıb.

Futbolxeber.az saytının İtaliya mətbuatına istinadən verdiyi məlumata görə, təcrübəli mütəxəssis komandasının Milan derbisinə ciddi hazırlaşdığını bildirib:

“Bu həftə komanda məşqlərdə çox yaxşı çalışdı. Son oyunlarda buraxdığımız səhvlər üzərində işlədik. İndi bütün bacarığımızı meydanda göstərməliyik. “İnter” derbiyə əla formada çıxacaq. Lakin biz də möhtəşəm futbol sərgiləmək fikrindəyik. Superkubok uğrunda görüşdə “İnter” hər 3 qolu standart vəziyyətdən sonra vurdu. Ona görə bu dəfə daha diqqətli olmalıyıq”.

Pioli komandasının son turlardakı uğursuz çıxışına belə münasibət bildirib: “Son oyunlarda uğursuz çıxış etdiyimizə görə tənqidlərin olması normaldır. İşlər qaydasında getməyəndə ilk olaraq özüm özümə nəyin qaydasında olmaması ilə bağlı sual verirəm. İlk növbədə daha da artırmalıyıq. Bu həftə futbolçularımın əzmi, istəyi məni çox sevindirdi. Bir daha əmin oldum ki, əla komanda ilə çalışıram. Bizi xüsusi edən komanda ruhunu hələ itirməmişik. İndi yenidən bunu sübut etməliyik”.  

Qeyd edək ki, bu gün keçiriləcək Milan derbisi Bakı vaxtı ilə 23:45-də start götürəcək. 20 turdan sonra “İnter” 40 xalla ikinci, “Milan” isə 38 xalla 5-ci pillədə qərarlaşıb.

Adil ƏHMƏDOV