Bilyaletdinov: “Qarabağ”la oyun Çerçesov üçün daha çətin olacaq"

Rusiyalı mütəxəssis Rinat Bilyaletdinov Çempionlar Liqasının 3-cü təsnifat mərhələsinin "Ferentsvaroş" (Macarıstan) - "Qarabağ" matçından gözləntilərini bölüşüb.

Futbolxeber.az saytının məlumatına görə, o, "Championat"a müsahibəsində bununla bağlı deyib: “Qarabağ”ın “Sürix”i necə keçdiyi aydın deyil. İsveçrə liqası milli komanda kimi yaxşıdır. Onlar həmişə ən yüksək səviyyədədirlər. “Qarabağ”da güclü legionerlər və millinin aparıcı oyunçuları çıxış edir. Növbəti mərhələ Stanislav Çerçesov ("Ferentsvaroş"un baş məşqçisi -red) üçün daha çətin olacaq".

R.Bilyaletdinov həmyerlisi rus mütəxəssis Çerçesovu "Ferentsvaroş"un ÇL-in 3-cü təsnifat mərhələsinə yüksəlməsi münasibəti ilə də təbrik edib.

Qeyd edək ki, "Qarabağ"la "Ferentsvaroş" arasında  ilk görüş avqustun 3-də Bakıda, Tofiq Bəhramov adına Respublika stadionunda keçiriləcək. Oyun saat 20:00-da başlayacaq. Cavab görüşü isə avqustun 9-u Budapeştdə keçiriləcək. Bu qarşılaşmaya da yerli vaxtla saat 20:00-da (Bakı vaxtı ilə 22:00) start veriləcək.