İtaliya millisi bu dəfə də natəmizliyə görə tənqid olundu: Bonuççi üzr istədi

Gözlənilmədən Şimali Makedoniyaya uduzaraq (0:1) dünya çempionatından kənarda qalan İtaliya milli komandası bu dəfə də natəmizliyinə görə tənqid olunub.

Futbolxeber.az saytının İtaliya mətbuatına istinadən verdiyi məlumata görə, Palermoda baş tutan qarşılaşmadan sonra “Skuadra Adzurra”nın paltardəyişmə otağından yayılan fotolar sosial şəbəkələrdə müzakirələrə səbəb olub.

Yayılan foto və videolardan görünür ki, paltardəyişmə otağı boş butulkalar, salfet kağızları və digər tullantılarla doludur.  

İtaliya millisinin üzvü Leonardo Bonuççi yaşananlara görə üzrxahlıq edib: “Etdiyimiz böyük səhv idi. Növbəti dəfə bu hal təkrarlanmayacaq. Düşünmürdük ki, bu, belə böyük əhəmiyyət kəsb edər. Baş verənlərə görə üzr istəyirik”.