“Aue”nin baş məşqçisi: “Nazarovun vəziyyətini bilmirəm”

Azərbaycan millisinin yarımmüdafiəçisi Dmitri Nazarov klubu “Aue”nin start heyətində meydana çıxmaq şansı əldə edib. Futbolxeber.az saytının məlumatına görə, buna səbəb “Hannover”lə qarşılaşma öncəsi iki yarımmüdafiəçinin zədədən əziyyət çəkməsidi.

Belə ki, “Aue”nin aparıcı oyunçularından Simon Skarlatidis və Fabio Kufmann zədəli olduqlarından, noyabrın 19-da II Bundesliqanın XIII tur matçını buraxa bilər. Baş məşqçi Pavel Doçev isə yerli mətbuata açıqlamasında son qərarını Nazarovun hazırlıq durumuna baxdıqdan sonra verəcəyini deyib: “Paskal Köpke Almaniyanın U-21, Dmitri Nazarov isə Azərbaycanın əsas millisinin düşərgəsindən qayıdıb. Onların hazırda nə durumda olduqlarını bilmirəm. Vəziyyətlərinə baxdıqdan sonra bir qərar verəcəm”.

Qeyd edək ki, bu mövsümdən “Aue”nin formasını geyinən Dmitri Nazarov əsas heyətə düşməkdə çətinlik çəkir (apasport.az).