“Zenit”in futbolçusu doğma şəhərində stadion tikdirdi

Rusiya millisinin və “Zenit”in yarımmüdafiəçisi Oleq Şatov anadan olduğu Nijni Taqildə stadionda tikdirib. Futbolxeber.az saytının məlumatına görə, 26 yaşlı futbolçu arenanın inşasına 15 milyon rubl xərcləyib. Bu işdə Şatova onun atası da yardımçı olub. O, lazımi materiallar və texnika ilə arenanın tikintisinə dəstək verib. Arenanın layihəsi Şatovla razılaşdırılıb. Stadionun kompleksinə Avropa standartlarına cavab verən süni meydança, voleybol və basketbol meydançaları daxildir.

Qeyd edək ki, yeni inşa olunan stadion idman məktəbinin balansında olacaq. Şatovun istəyi ilə buradan hər kəs yararlana bilər.