FIFA-nın yeni prezidenti məlumdu

Sürixdə FIFA-nın növbədənkənar konqresində quruma prezident seçkiləri keçirilib. Futbolxeber.az-ın məlumatına görə, ali futbol qurumunun prezidentliyi uğrunda 5 namizəd mübarizə aparıb. Bunlar İordaniya şahzadəsi Əli bin Əl-Hüsseyn, UEFA-nın baş katibi Canni İnfantino, Asiya Futbol Konfederasiyasının prezidenti şeyx Salman bin İbrahim Əl-Xəlifə, FIFA-nın sabiq baş katibinin köməkçisi Jerom Şampan və cənubi afrikalı iş adamı Tokio Sevaledir.

FIFA-nın üzvü olan 209 federasiyadan 207-si səsvermədə iştirak edib.

Seçkinin ilk mərhələsində qalib olmaq üçün səslərin 2/3-ni toplamaq lazım idi. Lakin bu mərhələdə qalib aşkarlanmayıb. Belə ki, Canni İnfantino 88, şeyx Salman bin İbrahim Əl-Xəlifə 85, İordaniya şahzadəsi Əli bin Əl-Hüsseyn 27, Jerom Şampan isə 7 səs toplayıb. Buna görə də seçkidə ikinci mərhələ baş tutub. Həlledici mərhələdə Canni İnfantino 115, şeyx Salman bin İbrahim Əl-Xəlifə 89, İordaniya şahzadəsi Əli bin Əl-Hüsseyn 4 səs toplayıb. Jerom Şampan isə səs verən olmayıb. Bununla da Canni İnfantino FIFA-nın yeni prezidenti seçilib. O, qarşıdakı 4 il ərzində quruma rəhbərlik edəcək.

Qeyd edək ki, AFFA-nı seçkirlərdə qurumun prezidenti Rövnəq Abdulayev, vitse-prezident Elşad Nəsirov və baş katib Elxan Məmmədov təmsil edəcək. AFFA seçkidə Canni İnfantinonu dəstəkləyəcəyib.