"Trabzonspor" yunan forvardı transfer edir

Son mövsümdə "Akhisar Bələdiyyəspor"un Superliqada qalmasında böyük rolu olan yunan forvard Gekas komandanı tərk edir. Futbolxeber.az-ın məlumatına görə, təcrübəli futbolçunun yeni klubu da artıq bəllidir. Belə ki, Gekas karyerasını yeni mövsümdə "Trabzonspor"da davam etdirəcək. Trabzon klubunun rəhbərliyi artıq yunan hücumçu ilə görüşmələri yekunlaşdırıb. Tərəflər bütün detallarda razılığa gəliblər. Bazar ertəsi Gekasın "Trabzonspor"un futbolçusu kimi ictimaiyyətə təqdim olunacağı bildirilir. Gekası heyətinə qatan "Trabzonspor" braziliyalı qolçu Henrikenin komandada qalıb-qalmayacağı barədə hələlik qərar qəbul etməyib. Mövsüm boyu qeyri-stabilliyi ilə diqqət çəkən və sona yaxın formasını yığan Halil Altıntop da məşqçilər korpusunun verəcəyi qərarı gözləyir. Verilən məlumatlara görə, "Trabzonspor" Halili heyətində saxlamaq istəməsə, futbolçu yenidən Almaniyaya dönəcək. Halitin Bundesliqa klubundan təklif aldığı bildirilir.