Azərbaycanlı futbolçu: "Portuqaliya ilə matç mərhələdəki ən vacib oyundu"

Əslən azərbaycanlı olan, lakin Rusiya millisinin şərəfini qorumağı üstün tutan Aleksandr Səmədov dünya çempionatının seçmə mərhələsi haqda danışıb. Futbolxeber.az-ın məlumatına görə, Səmədov Portuqaliya ilə matçın böyük əhəmiyyət kəsb etdiyini bildirib: "Demək olar ki, seçmə mərhələdəki bütün oyunlarda iştirak etmişəm. Adım yenidən yığmanın siyahısına düşübsə, deməli məşqçilər məni unutmayıblar. Portuqaliya millisi çox təhlükəli rəqibdir. Amma biz onları 1 dəfə məğlub etmişik. Lissabondakı oyun seçmə mərhələdəki ən vacib görüşümüzdür. Əgər, səfərdən qələbə ilə dönsək, qrupda birinci yeri özümüz üçün böyük ölçüdə həll edəcəyik. Həm də biz oyuna rahat çıxacağıq. Portuqaliya millisinin üzvləri anlayırlar ki, mütləq qələbə qazanmalıdırlar. Bu səbəbdən də onlar meydana gərgin vəziyyətdə çıxacaqlar".