"Cim-Bom" və "Fənər"in növbəti hədəfi Kostadı

"Fənərbaxça" klubu "Valensiya" klubunun aparıcı üzvü Tino Kostanı heyətinə qatmaq istəyir. Futbolxeber.az-ın məlumatına görə, "sarı-lacivərdlilər" Kostanın transferi ilə bağlı qarşı tərəfə müraicət etməyə hazırlaşarkən, İspaniya mətbuatı ortaya mqaraqlı iddia atıb. Bəlli olub ki, əzəli rəqibindən daha cəld tərpənən "Qalatasaray" artıq Kostanın transferini reallaşdırmaq üçün "Valensiya" ilə danışıqlara başlayıb.

"Fənərbaxça" hələ ötən il Kostanı heyətinə qatmaq istəsə də, arzusuna çata bilməmişdi. Bu dəfə "Fənər" argentinalı futbolçunun transferini reallaşdırmaq üçün başqa vasitəyə əl atıb. Belə ki, "sarı-lacivərdlilər" "Valensiya"nın sabiq futbolçusu, hazırda "Fənər"in heyətində çıxış edən Mehmet Topalın meneceri Batur Sltıparmakın vasitəsilə keçidi həll etmək istəyir.

Argentinalı futbolçunun meneceri olan atası Andres Qarsiya da Kosta ilə bir çox klubun maraqlandığını söyləyib: "Şərikim hazırda Türkiyədədir. Türkiyənin bəzi klubları oğlumu heyətində görmək istəyir. Lakin hələlik ortada rəsmi heç nə yoxdur".

Tino Kostanın özü isə verdiyi açıqlamada "Qalatasaray" haqda xoş fikirlər səsləndirib: "Türkiyə futbol ölkəsidir, "Qalatasaray" da möhtəşəm klubdur. Amma düzünü eşitmək istəyirsinizsə, nədən bəhs edəcəyimi bilmirəm. Çünki "Qalatasaray"dan real təklif almamışam. İndi bütün diqqətimi "Valensiya"nın uğurlarına yönəltmişəm".