Nazarov oynadı, komandası Bundesliqaya bir az da yaxınlaşdı

Almaniya ikinci Bundesliqasında 30-cu turun oyunları keçirilir. Futbolxeber.az-ın məlumatına görə, millimizin üzvü Dmitri Nazarovun formasını geydiyi “Karlsrue” öz meydanında “Qroyter Fürt”ü qəbul edib. Oyuna ehtiyat oyunçular skamyasından başlayan Nazarov, meydana 84-cü dəqiqədə daxil olub. Matç “Karlsrue”nin 2:1 hesablı qələbəsi ilə tamamlanıb. Bu qələbə sayəsində Nazarovun komandası Bundesliqaya bir qədər da yaxınlaşıb. Belə ki, çempionatın sonuna 4 tur qalmış “Karlsrue” 52 xalla üçüncü pillədə qərarlaşıb. 1 oyun az keçirən “İnqolştadt” 58 xalla liderdir. İkinci pillədə qərarlaşan “Kayzerslautern”in isə 54 xalı var. Nazarovun komandası mövsümü ilk 2 pillədə başa vursa birbaşa Bundesliqaya yüksələcək. Komanda üçüncü yeri tutsa, o zaman Bundesliqaya yüksəlmək üçün pley-off oyununda qüvvəsini sınayacaq.