“Lans” öz meydanında qələbəyə həsrət qaldı

Fransa ikinci liqasında 35-ci tura yekun vurulub. Futbolxeber.az-ın məlumatına görə, turun son oyununda Hafiz Məmmədovun sahibi olduğu “Lans” öz meydanında “Anje”ni qəbul edib. Tərəflərin səylərinə baxmayaraq, qarşılaşmada hesab açılmayıb - 0:0.

Bununla da “Lans” yenidən ikinci pilləyə qayıtmaq şansını boşa verib. Hazırda 35 turdan sonra aktivində 59 xal olan “Lans” üçüncü pillədə qərarlaşıb.

69 xala malik “Mets” artıq Liqa 1-ə vəsiqəni təmin edib. İkinci pillədə qərarlaşan “Kan”ın da akivində “Lans” kimi 59 xal var. Amma bu komandanın ehtiyatda 1 oyunu mövcuddur. Sona 3 tur qalmış “Lans” dördüncü yerdəki “Nansi”ni 2, 5-ci pillədə qərarlaşan “Niort”u isə 3 xal qabaqlayır. Bu isə o deməkdir ki, son 3 turda “Lans” Liqa 1-ə yüksəlmək üçün məhz bu iki komandayla mübarizə aparmalı olacaq.