“Bavariya” yenə dünyanın ən güclüsüdür

Beynəlxalq Futbol Tarixi və Statistikaları Federasiyası (İFFHS) dünyanın ən güclü klublarının reytinq siyahısını açıqlayıb. Futbolxeber.az-ın məlumatına görə, 201 klubun adının yer aldığı siyahıya yenə “Bavariya” (Almaniya) başçılıq edir. “Real” (İspaniya) ikinci, “Barselona” (İspaniya) üçüncü, “Çelsi” (İngiltərə)  dördüncü, “Atletiko” (İspaniya) isə beşincidir. Bu 5 komandanın mövqeyində heç bir dəyişiklik baş verməyib. Ötən ayla mqayisədə 1 pillə irəliləyən “Bazel” (İsveçrə) altıncı, 5 pillə irəliləyən PSJ (Fransa) yeddinci, 11 pillə irəliləyən “Nasional” (Kolumbiya) səkkizinci, 1 pillə geriləyən “Fiorentina” (İtaliya) doqquzuncu, 14 pillə irəliləyən “Lanus” (Argentina) isə onuncudur.

“İlk 20-lik”də həmçinin “Arsenal” (İngiltərə), “Napoli” (İtaliya), “İndependiyente” (Kolumbiya), “Tottenhem” (İngiltərə), “Borussiya” (Dortmund, Almaniya), “Yuventus” (İtaliya), “Benfika” (Portuqaliya), “Atletiko Mineyro” (Braziliya), “Veles Sarsfild” (Argentina) və “Sevilya” (İspaniya) klubları yer alıb.

“Mançester Siti” 24-cü, Ruslan Abışovun çıxış etdiyi “Rubin” 27-ci, “Mançester Yunayted” 39-cu, “Latsio” 43-cü, “Milan” 49-cu, “Ayaks” 70-ci, “Roma” 77-ci, “Liverpul” isə 131-cidir.

Türkiyə təmsilçislərin ən yaxşı nəticə “Trabzonspor”a məxsudur. “Bordo-mavililər” 31-ci pillədə qərarlaşıb. “Qalatasaray” sıralamada 72-ci, “Fənərbaxça” isə 88-ci yeri tutur.