Dünya çempionumuz: “Olimpiya Oyunlarına hazırlaşmalıyam”

Albaniyanın paytaxtı Tiranada keçirilən güləş üzrə U-23 dünya çempionatında qızıl medal qazanan Azərbaycan idmançısı Jalə Əliyevaə (57 kq) vətənə qayıdıb.

Futbolxeber.az-ın məlumatına görə, bu barədə Azərbaycan Güləş Federasiyasının saytı açıqlama yayıb.

Azərbaycan qadın güləşi tarixində bu yaş qrupunda dünya çempionu olan ilk qadın güləşçimiz Heydər Əliyev Beynəlxalq Aeroportunda jurnalistlərin suallarını cavablandırıb.

O, təəssüratlarını belə bölüşüb: "Dünya çempionu olduğum üçün çox sevinirəm. Düzdür, bu, mənim ilk uğurum deyil. Ancaq ilk dəfədir dünya çempionu oluram. Çalışacağam ki, bundan sonra daha böyük uğurlara imza atım”.

J.Əliyeva ən çətin görüşünün finalda yaponiyalı güləşçiyə qarşı olduğunu vurğulayıb: “Qarşılaşmaya çox yaxşı başlamışdım. Sonra o cəld olduğu üçün çox yoruldum. Amma yekunda qələbə qazana bildim”.

Güləşçi gələcək planlarında da söz açıb: “Bundan sonrakı planlarım qarşıdan gələn yarışlara daha da yaxşı hazırlaşmaqdır. Avropa və dünya çempionatlarına, Olimpiya Oyunlarına hazırlaşmalıyam”.

Qeyd edək ki, Jalə DÇ-də ukraynalı Alina Filipoviç (7:4), türkiyəli Sevim Akbaş (10:0), amerikalı Sofiya Makaluso (10:0) və yaponiyalı Ruka Natami (10:8) üzərində qələbə qazanıb.