“Milli Olimpiya Komitəsinin dəstəyi voleybolun inkişafı üçün faydalı olacaq”

“Voleybolu Olimpiya hərəkatında təmsil etmək önəmlidir”.

Futbolxeber.az saytının məlumatına görə, bu sözləri Azərbaycan Voleybol Federasiyasının (AVF) prezidenti Şahin Bağırov Milli Olimpiya Komitəsi (MOK) ilə birgə əməkdaşlığa dair niyyət protokolunun imzalanma mərasimindən sonra jurnalistlərə açıqlamasında deyib.

O bildirib ki, Milli Olimpiya Komitəsinin dəstəyi voleybolun inkişafı üçün faydalı olacaq: “Bu layihədə Azərbaycan Voleybol Federasiyasına etimad göstərildiyi üçün MOK-a təşəkkür edirəm.

İdmançıların hazırlıq mərhələsində, məşqlərin reallaşmasında, komandaların yarışlara göndərilməsində Milli Olimpiya Komitəsindən dəstək almaq önəmlidir. Bu lazimi köməklikdən yararlanaraq nəticələrimizin uğurlu olması üçün əlimizdən gələni edəcəyik”.